Heim Beint á efnisyfirlit síðunnar







Í samstarfi við Barnahjálp Sameinuðu þjóðanna, UNICEF, urðu Flataskóli og Laugarnesskóli fyrstu réttindaskólarnir á Íslandi, sá áfangi náðist í nóvember 2017.

Frístundaheimili þessara skóla, Krakkakot og Laugasel, fengu einnig viðurkenningu fyrir fyrstu réttindafrístundirnar á sama tíma. Í nóvember 2019 fengu sömu skólarnir og frístundirnar endurmat og því viðurkenningu í annað sinn.Síðan þá hafa margir skólar innleitt verkefnið og eru nú margir skólar á Íslandi orðnir Réttindaskólar. Réttindaskólar byggja starf sitt á Barnasáttmálanum en hann felur í sér alþjóðlega viðurkenningu á að börn þarfnist sérstakrar verndar umfram hina fullorðnu. Næsta endurmat er fyrirhugað í nóvember 2022.  Réttindaskólar eru alþjóðlegt vottunarverkefni sem hefur borið mikinn árangur meðal annars í Bretlandi og Kanada. Verkefnið felst í að fræða börn um Barnasáttmála Sameinuðu þjóðanna sem tekur á öllum þeim réttindum sem börn öðlast við fæðingu og hafa til átján ára aldurs.

Réttindaskólaverkefnið skapar ramma utan um þau markmið sem koma fram í aðalnámskrá grunnskóla, grunnskólalögum og Barnasáttmála Sameinuðu þjóðanna um mannréttindi, jafnrétti og lýðræði.  Eitt af meginhlutverkum grunnskólans í samvinnu við heimilin er að stuðla að alhliða þroska allra nemenda og þátttöku þeirra í lýðræðisþjóðfélagi. Markmiðið er að byggja upp lýðræðislegt námsumhverfi, auka þekkingu á mannréttindum og stuðla að gagnkvæmri virðingu innan skólasamfélagsins.

Þátttökuskólar leggja Barnasáttmála Sameinuðu þjóðanna til grundvallar öllu starfi sínu.

 

Heimasíða Réttindaskóla UNICEF

 

   
English
Hafðu samband