Fréttir frá 5 ára

12.06.2014

Síðustu vikuna áður en skólanum var slitið fóru 5 ára nemendur í margar heimsóknir og ferðir. Mánudaginn 2. júní fóru þeir í heimsókn á Bæjarból til að fara í Umferðaskólann. Þeir skemmtu sér vel um leið og þeir fóru yfir þarfar reglur umferðarinnar. Þá var einnig farið yfir mikilvægi þess að vera ávallt með réttan öryggisbúnað í umferðinni og hve mikilvægt það er að fara alltaf varlega. Í lok umferðaskólans fengu svo allir flotta litabók um "Innipúkann" að gjöf.

Þriðjudaginn 3. júní var farið með strætisvagni í Hellisgerði í Hafnarfirði. Þá var frábært veður og nutu krakkarnir sín vel ásamt öðrum nemendum úr ýmsum grunnskólum Hafnafjarðar og var þeim meðal annars boðið að vera með í skemmtilegum leikjum. Krakkarnir voru mjög hrifnir af Hellisgerði og hittu þar til að mynda álfa, kíktu í helli og æfðu sig í klifri út um allan garð.

Fimmtudaginn 5. júní var svo farið í vorferðalag Flataskóla. Í þetta sinn var förinni heitið í Furulund í Heiðmörk en þar er ekki bara fallegt umhverfi heldur einnig mörg skemmtileg leiktæki. Dagurinn byrjaði á því að krakkarnir fengu tíma til að leika sér í fjölbreyttum og krefjandi leiktækjum, svo gæddu þau sér á pylsum áður en farið var í ratleik með kennurum þar sem allir leystu alls kyns þrautir í leiknum.

Myndir frá þessum ferðum er að finna í myndasafni skólans.

Til baka