100 miðaleikur á vorönn

Í dag hefst 100 miðaleikurinn og mun hann standa yfir í tvær vikur eða fram til föstudagsins 28. mars. Leikurinn gengur út á að á hverjum degi fá tveir starfsmenn fimm sérmerkta hrósmiða hvor og eiga þeir að veita nemendum þá fyrir að fara sérstaklega vel eftir siðum Flataskóla. Þegar nemandi hefur fengið þennan hrósmiða fer hann til ritara með hann og dregur númer hjá honum til að staðsetja sig á "bingóspjaldinu" sem hangir á vegg við skrifstofuna. Allt er þetta skráð um hver á hvaða númer. Tölvupóstur er sendur til foreldra og þeim tilkynnt að barnið þeirra hafi fengið hrósmiða fyrir rétta hegðun og sé þar með orðið þátttakandi í leiknum. Áður en leikurinn byrjar er ákveðið hvaða röð er vinningsröð og einnig hvaða umbun verður fyrir þá röð. Algjör leynd hvílir yfir þessu og verða úrslit tilkynnt 31. mars og umbunin veitt í framhaldi af því.